Al Hizbul Azam

"Al Hizbul Azam (Second Edition)" A Collection of Duas By Ali Bin Sultan Muhammad Al Qari (Rahimahullah) Consisting of Arabic Duas With Roman English Translation.Ali Bin Sultan Muhammad Al Qari Al Harvi Jo Mulla Ali Qari Ke Naam Se Jaane Jaate Hain 11th Sadi Hijri Ke Mashhur Mohaddis, Faqeeh Aur Uloom-e Aqliyyah Wa Naqliyyah Ke Jaame, Fiqh, Hadis Aur Ilm-e Kalaam Mein Kamaal Ka Darja Rakhnewale Aur 125 Se Zaaid Kitabon Ke Musannif (Author) Hain.Duaon Ke Silsile Mein Aapki Kitaab "Al Hizbul Azam" Bahot Ahem, Nihayat Umdah Kitaab Hai, Jisko Qubuliyate Amma (Shohrat) Hasil Hui. Yeh Kitaab Quran Wa Hadis Mein Mazkur (Zikr Ki Gayi) Duaon aur Salaat Wa Salaam Par Mushtamil Hai Jo Hafte Ke Saat (7) Dinon Ke Lihaz Se Saat (7) Manzil Par Munqasim (Divided) Hai, Hamare Akabireen (Great Scholars) Apne Mutawassileen (Followers) Ko Yeh Hidayat Dete The Ki Rozana "Al Hizbul Azam" Ki Ek Manzil Padhne Ka Maamul Banayen.Allah Ke Fazl Wa Karam Se Mumbai Ki Chand Fikarmand Khawateen Ne Iss Kitaab Ka Tarjama Roman English Mein Kiya Hai Taaki Woh Tabqah Jo Sirf Angrezi Padhne Par Qadir Hai Woh Iss Roman English Tarjama Ki Madad Se Duaon Ka Matlab Wa Mafhum Samajh Sake, Iss Roman English Tarjama Mein Maulana Badr-e Alam Merathi Rahmatullah Alaihi Ke Tarjame Se Istifadah Aur Madad Li Gayi Hai.Iss Tarjama Ki Khidmat Anjam Denewali Jamaat Mein Wakil (Lawyer, LLM), Talibaat (Students) Aur Alimaat Waghaira Shamil Hain. Iss Kitaab Ki Proof Reading Aur Tashih (Correction) Mumbai Ke Mustanad Muftiyan-e Kiram, Ulama Aur Aalimaat Ne Badi Tawajjoh Aur Bareek Bini Se Ki Hai, Iske Baad Bhi Agar Kahin Koi Ghalati Nazar Aaye To (Toh) Ittela Farmaye Taake Aainda Usse Sahi Kiya Ja Sake.Note: Yeh Kitaab Play Store Aur App Store Par Bhi Available Hai For Free Aur Jo Ahle Khair Hazrat Iss Kitaab Ko Dobara Publish/Chaapne Ka Iraada Rakhte Hon Woh Iss Email Id Par Contact Karein Poori Maalumaat Di Jayegi.Email: [email protected]